♣ همسات .. بنكهة الغِــياب ♣

.
من مواقفي و صغاري ( القبطان الكبير " عمره 4 سنوات ونصف " ،
وعبسي الصغيرة وعمرها ثلاث سنوات الا شهرين ) :
وبصدق بنقلهم كما بيحدثو ما بزيد اشي .

~~~~~~~~~~~~~~~
_ القبطان : سأكضي على الؤفتيه ئيش كان لأنو هادا آخر يوم في حياتي . " تحريفا لمقولة شرشبيل الشهيرة "
_ عبسي : ماما ، أنا بحب أردن .. بحب حنونه .. بحب تيتا فطوم .. بحب مممممم اكتر اشي .. أكتر اشي :
( وأنا كأم متحمسه لشخصيتي ، حكيت : اسمي ع الطريئ )
وإذ : حب اكتر اشي كيتي وميكي ماوس !
( وأنا كأم انحلأ إلها رديت : طيب ! )
_ القبطان : ماما عملتي ملوخيه ؟؟؟!!! ( انشكاااح وانبساااط كنو ربح المليون وهذا موقف يتكرر كل ما طبخنا ملوخية بتفاصيل مختلفه كل مره )
آه حبيبي بس تجهز بغديك ... ( مبسوطه ع حالي عامله اشي كويس )
شاطره ماما انتِ امرات افهمي عنجد عنجد !
نعم يخوي ! امرات !؟؟ وأمرات التانيه بفهمش ؟؟
أمرات تانيا انتِ اعملي فووول كوني افهميش ابدن !
" ناهيكم عن حركات الجسم التي كلها انقرافيه ولا توصف ! "
_ عبسي : موااااه ماما حبيبي ( بوسه يعني ، عند بعد )
تحمست الماما عاد وراحت لتبوسها عنجد ، بس قربت وبستها :
ماماااااااااا لا بوووسيني !!! أنا حمّمت !
يعني متوضيه يا شيخ !؟ ليش ما ابوسك !؟؟؟
انتِ بتزهئيني عشان !
_ القبطان : ون توو ثريي فووور فاااااااااااا ....
عرضت عضلاتي وبساعده : يــف !
ماما ؤسكتي !
( سكتت لاني مطيعه انا .. )
كمّل : اكس .. اكس .. سكس .. بوووز اخص !
( مني جايبها آه ، الصراحه راحه مش بخبي عليكم يعني ،
بس كيف ركبها مع بعض بعرفش ،
انا بحكيها بمواطن اخرى من الأحاديث .. هو لحاله هيك سفطها ! )
_ عبسي : ماما ..
نعم ،
ماما ..
نعم ..
ماما ،
نعم لين !
ماما :
عزا !؟؟؟؟
ماما .. انتِ بتحبي لين ؟؟؟
طبعا يا ماما انتِ عيون البي ( شوفوا الحنان والرومانسيه وبتحكي امي بنفعش ام آل ! )
ردت : ولين بتحب السُّحليئه كمان كتير ! " الزحاليئ والمراجيح يعني "

( العلاقه بين اي اشي بالموقف مع الاشي التاني ، مفهومة ومترابطه بالتأكيد .. بس غير الله عارف كيف يعني ! البنت تركيزها قريب من تركيزي حد الدهشة بصراحة )
_ القبطان : الذووبااااابه تيرا رم .. البّلعوناااااااااااا
يا ماما مش بلعونا ! ملعونه !
الذبااااباااا تيرا را رم .. الملعووووبااااا !
ملعونـــــــــــــــــاااااا يا ماما !
زبّطها الصحيح : ملعووووناااا يا ماااماااا !
_ عبسي : ماسكه فاين ، ومركزززززززززززززززززه مع السجاده تمام !
بحكيلها : لين شو بتساوي ؟؟
ببحث ..
عن شو بتبحثي ؟
كع ..
شو الكع ؟؟؟
سرسور !
سرسور شو عزا !؟؟
ماما لا إدّخلي مع لين ( لا تتدخلي بشغلي يعني ) لين موتّو هلا شيلو !؟؟؟
( دواوين ) ! عنجد هي بتؤتل الحشرات ان طلع نمل او اشي زغير بتحرك .. مش مزح ، وبتشيلهم بالفاين عنجد لا انا ولا عمر بنسترجي !
القبطان : صحي من النوم وضل ساكت
ومش من عادته يسكت اصلا فما بالكم الصبح بعز نشاطه يعني ،
بسأله : شو مالك ماما ؟
حلمت حلم مزعج
شو حلمت حبيبي ؟
لا أستطيع احكيلك اكّلام !
لا ماما احكي مش مشكله ..
لا استطيع يا ماما !
( ارتعبت بجد من شكله وحزنت عليه لانو شوي وحيبكي بيؤلي انو ما حيئدر يحكي كلمات معينه لانها حتزعجني انو كلام ممنوع يعني ، انا فكرت شتائم حلمان فيهن .. )
طيب لا تحكي كلام خطأ، بس شو الحلم ؟؟
لا بتزعلي من عمر ؟؟
لا يا البي بزعلش منك حبيبي انت ..
حلمت ( وبدأ يبكي بالفعل ) ..
انو **** قرصتني بالسُّره !
شفّر اسم الفاعل ! فأنا مش عارفه شو الشتيمه هاي اللي بدوش يحكيها وقارصته ببطنه بالسُّره !
شو ئرصك وك احكي خلص !
بانفعال شديد : الناموسه !! وسار يبكي بحرقه !
ضميتو عشان ما يشوف ردة فعلي على وجهي وطب طبت عليه ، وحكيت الو : شريره هاي الـ **** !
آه ماما شريره انا لا بحبها ، ولا رضي يحكي اسمها بالمره باقي الحديث !

ـــــــــ
اللهم بارك في أولادنا ولا تضرهم وارزقنا برهم، واجعلهم قرة عين لنا .. ووفقهم لطاعتك ،
اللهم متعهم بأسماعهم وأبصارهم وقوتهم في سبيلك،
واجعل هواهم تبعا لما جاء به حبيبك محمد صلى الله عليه وسلم،
انك على كل شي قدير وبالاجابة جدير