العقــ☺ــل زيــنـــ☺ـة !

رد: العقــ☺ــل زيــنـــ☺ـة !

.
شو هي هالقد معقدة حياتي يعني
ب 3 اسطر بتنقال كلها
لا يخت عندي
و لا تلفون بالسيارة
و الحمد لله رب العالمين ما بلعب بوكر
بالباصرة بلخبط
و فيديو وتلفزيون ما بحضر ، ما بحضر لانه بغفى
هايدا الريون اكس يالي بيطلع من الشاشة اله علي تأثير مخدر
فما في لزوم حشش مثلا .. يعني الحشيش الله مريحني منه
هاديني على الريون اكس بداله
اذا اعتزت انسطل،
و حياتي هياها اذا كنت رايق شوي شي ليلة
بيصير في تقنين
و اذا في كهربا بعصب لانه بشوف قديش بيتي بده ترتيب
و كل شي فوق بعضه
واوووف شو ناقص اشيا و زايد اشيا
و اذا اجيت اتلقح شوي شي مرة بعد الغدا
بيتلقح واحد صاحبي بالمستشفى فبلبس وبنط لعنده
شو بعد في ..؟
بعد في البيانو
كل ما دق بيانو بشتاقلك !
و اذا كنت ما عم دق بيانو و عم بشتقبلك
بكون نايم
و هون بكون احسن شي !
ما النوم بروفا للموت
انتهينا .

.

المصدر: شبكة ومنتديات صدى الحجاج

.
يا عيني هيدا برج الجدي مش برجي انا وحدي
لتفهمي يعني ..
مش كل ما اعمل شغلي او يطلع معي شغلي
دغري انو هيدا برج الجدي !
وناتعتيلي كتابين او تلاتة عن الجدي كل النهار !
هيدا الجدي يصطفل ..
مش انا الجدي الوحيد يعني ,
مش انا المأسس للجدي !
في اشيا مشتركة بيني وبين هالبرج
كوني انا جدي ..، حقيقة صحيح .
بس في اشياء خاصة فيي ومش موجودي بالجدي
كيف خصها فيك ؟
خاصة فيي أنا .. انا !
كشي غير جدي !!
يا اختي شليلي هالكتاب من ايدك
خاصة فيي انا ككراز كدلفين كجحش ! منيح !!
كتير منيح .
كتير منيح ؟؟

.

.
Listen to me my friend
We are Lebanese people
يعني ما باعرف كيف بدي قلك
We are
نحنا شو شغلتنا؟
We are business
نحنا Lebanese people شغلتنا ننزع كل شي موجود و بتطاله ايدنا
ما باعرف اذا فهمت علي
اذا عندك شغلة يا اخي تخربها سلمها او طيلها للـ Lebanese people
نحنا شغلتنا ننزعها و بعدين ( نعن ) انتبه بنعن بس نخلص منها
شغلتنا نعنّ و نقعد ننعيها انه يا الله انتزعت.
شغلتنا كذلك نخرب كل شيئ و بعدين نترسّم و نقول
لم يتبقى لنا اي شيئ .
شغلتنا على مراحل، انتبه :
اول مرحلة الدمار مثلا .. الدمار شغلنا
و تاني مرحلة نظم الرادي عن الدمار
اول مرحلة مثلا الفوضى شغلنا
و تاني مرحلة النعي ع الفوضى
شغلتنا بالمختصر, يا غابة مطلقة نحنا مشجرينها نحنا ساقينها نحنا مربينها
يا ...عيطوا للسوريين .
يعني شغلتنا تخريب الامن اولا ... تانيا طلب السوريين ليعملوا الامن
و ثالثا ( على 3 مراحل صارت هلأ )
التذمر من السوريين انه يا خيي تفضل هلئ السوريين بدهم يعملوا الامن.
هيك ونحنا عفكرة لشو طالبين الامن ... نحنا طالبين الامن لنطئ حنك ...
يعني من بعد ما خربنا البلاد كلها مع شجراتها طالع ع بالنا هلأ نطؤ حنك
و الله مننبسط بطقته ... يعني ... طرق ... طرق ... طرق
طأ الحنك متل صوت الدربكه بالنسبة لالنا
بيعني شي حميم يمكن ... تراث... لأ اكيد بدنا السوريين
او اي امن كمان مرق على تاريخنا بهالحرب
بدنا اخي يعني بدنا بدنا فعلا يعني
بدنا ناس يهتموا بالامور يالي نحنا مش فاضيين نضيع وقتنا فيا مثلا
متل الامن ...مثل الاستقلال ...مثل وحدة البلاد متل الحوار ...
شو هالخبريات هي ...هيدي اشيا ثانوية ....
نحنا مشغولين يعني ...نحنا ما فاضينلها ....نحنا عنا تقييس بلاطنين ، بلاطنين مش زابطة على كروشنا كمان...
ما البنطلون الطلياني ولك خيي يعني ما تزعل مني ...
اللي ما بيساع كرشنا ... يعني هايدا شو ديفوو هايدا ...
هايدا من ايطاليا جاي ديفوا بيكون ... لانو ليفوت كرشك فيه بده يكون اجريك اطول منك بشي نص متر ...
شو هالصناعة المتحضرة ، نحنا مشغوليين يعني ، معقولة يعني هي شغلتنا يعني نضييع وقت بالبناطلين ،
نحنا مشغولين بدنا نضهر ، بدنا نسهر ، بدنا نرقص زي ترافولتا اذا قدرنا يعني ،
نحنا عنا نشرة اخبار بدنا نقدمها متل ما بقدمها الاميركان يا خيي ...مقتضبة ...مقطعة ....سريعة ...بس بفرق وحيد عنهن انها فاشلة ...وهبيلة ...وريحتها سمنة حموية بدل الزبدة وثوم بدل المايونيز ،
شو لكان ...نحنا فاضيين !!!!!!!!
نحنا مشغوليين نحنا بدنا نخرب الساعات ...والغسالات ...والبرادات ...والتلفزيونات ....هودي الغرب بيخترعن ...شو مالغرب مستعمرنا !
قال شو بيبعتلك كتالوج قال ، فاضيين نقرأ كتالوج نحنا.
بعدين it's too late ....هذا الكتالوج ما فينا نقراه لانو صار بالقظان اساسا ...
ومع انو القظان بيشتغل على الناريت نحنا مشينو على الكتالوجات ، وهذا ارقى
ولو خيي ....مادام شغلنا يعني تصور ، كابس لدرجة انو ما فاضيين نعرف شو السر
شو السبب لحتى هالحالة ما كانت تعرف تجلس من 12 سنة لليوم ، مش شغلتنا طيب ....
مهي ايادي خارجية عم تلعب بمصايرنا ، وخلصنا .... نحنا شو دخلنا هول دول كبيرة عم بيلعبوا فينا ... اما نحنا اذا بترجع لقلنا ...
اذا بتسألنا ... اذا بتحب تاخد راينا ...والله ما معنا خبر شو عم بيصير وليه عم يصير معنا هيك ، نحنا ابرياء بشرفي ،
وحياة ولادك ...
وهيدا اللي شايفو انت طالع بالعكس على الكورنيش ...مسكين الله يساعدو ....معمي قلبو ...ارهقتو الحرب صدقني ....
وهيدا اللي بنط عن الصف كلو وبيفوت راسو من طاقة الفرن
بدو خبز، ما هيدا جوعان ، جاي يأمن خبز لاولادو ...
ما شايف الصف ...ماشايف ، كدر ، حزن عميق ...وهيدا اللي بدو ينجح كمان بدون فحص ...هايدا ما تزعل منو ما فيك
هيدا يتيم ...والفحص بدو يحطو بموقف حرج ....حدا بيفحص يتيم
الله بقولها هاي ؟!...
طيب ليش انت ما تشوف انو رغم كل هالنكسات ، بعدنا قادرين نستلم اتخن مخلوق بالبشرية ، منزعبر على ... ولاه
و ما بيعرف ...
هلأ ...اطلع هاي مش فيات ( سيارة ) ركبتلها يا ريس موتور فراري .
شو رأيك؟ طلاع سوقها ، وفلت نبريش الريدياتيير لانو ما لو عازة
...ماشية السيارة فرجه بلاه ، بس هني بالشركة مدري ليش حاطينو يعني ، بيحطو يعني لانو يمكن تحما السيارة ...بس منين بدها تحمى ...ما راح تحمى ...
انا عندي طريقة ما بخليلك ياها تشوف الحماوة ، هي شغلتنا ... my dear
تخريب للموجود على اساس انو تعديل للموجود ، وتأسيس لتخريب اي شي ممكن يجي بالمستقبل ومحضرينلو تعديل نحنا ،
القانون معدل، الفيتيس معدل ، المية وعشرة معدل ، وع هالمعدل ،
واللذة ، انك اذا بتاخد هوياتنا كلياتنا ،
ما في واحد مذكور ع هويتو انو هي شغلتو ...
يمكن لانو هاالمصلحة هي بعد ما الها اسم ، هيدي خلقة بتكون هبة من الله ،
نحنا متل التلميذ البهلة والمستذكي ، او الذكي كتير وذكاه اكبر من عمرو وغلطوا وخبرو ، فهبلا ، منيح ؟
تلميذ اهم مشاريعه
و انجازاته انو قدر عمل هوووووو ومن كل قوتو بس ضهر لحظة الناظر من الصف ، وبس رجع الناظر قعد عاقل ومتل التوتو
( يالي اكيد سامعين فيه )
متل التوتو ...بس كتييييير مبسوط انو عمل هوووووووو
وهيدا الحمار يالي هو الناظر ما عرف مين عمل هووووووو
يالطيف شو هالانجاز !
اساسا شو هالمستقبل من بعد ال هوووووووووو
شو رح يصير شو بتعمل؟
والابشع من هيك لو بيعرف هايدا انو الناظر عرف مين عمل هووووو
وآفرو
وما قلو شي ، كل همو انو بس هو رجع وصار بالصف
ما حدا بقى يعمل هووووو...
يا خي الناظر مش مأيّد عقلو عليه ....
فاضيلو يا الله ...!!!!!!!!!
دخيلو ؛
( يتبـــــــــــــــــــــــع )
.

،

،
المقطع التاني من الحلقة الثانية من : العقل زينة/ زياد الرحباني
يا اخي قد ما بتسمع مسرحيات للأخوين رحباني
وخاصة وقت ما كانوا تنين عاصي ومنصور الرحباني
وبتكون مهاجر او مبعد او مغترب قال
وقال بتصير تحس بتفكر بدك تطل عأهلك بالصيف
علبنان الحِلا بيتهيألك بس رح بتوصل راح تشوف اخضر اكيد
ويمكن تحتاج لحكيم عيون قد ما كلشي عم تشوفه اخضر
و راح تشوف الشيم على الوصلة
وعالي الشمايل راح يخلصلك غراضك بالمطار نفسه
وراح تشوف واحدة تقلها هلي عالريح يا عيني
ولا تخافي سالم غفيان مش بردان
ايّ ايه مدنق سالم اي والله
وبدنا نكفي باللي بقيو مش بدنا نكفي على اللي بقيوا
وطبعا والشعب العنيد هايدا الشعب العنيد حتلتقي فيه على الوصلة
وعنيد رح تلاقيه عنيد اه بس مش عنيد على الفاضي
عنيد عالشي تيسنة يعني اكتر من العناده
هايدا تيس هايدا ماسك الطائفية وعنيد
خود بقى تعى قيمني
اي لأ
بس توصل من المهجر شي بتوصل على المطار
راح تتطلع اكيد
فخر الدين مش مبيّن بقاعة الوصول يعني
والجبال يالي ما بتنطال, كلها مقصوفة
وايا ملقوطة من كل مرابض المدفعية من وين ما كنت
و عفكرة ضمن الاراضي من وين ما بدك فيك تقصف وين ما بدك قد ما طويلة البلد وضخم
يا اخي المشعل باميركا والحرية عنا
نحنا مأجرين المشعل للامريكان
حدا الو مع .... ؟
بس تاركين الحرية هون
انه مين فكرك راح يستقبلك على المطار تسلم لي
الملكة بيترا يعني ؟
ولا زنوبيا شخصيا ؟
مين فكرك انت يالي حي زقلك الشنط ؟
فاتك المتصلب ... لا !!؟؟
يا اخي الصرافة صرافة والتدفيش تدفيش
و الشنط الله بيعرف شو في بهالشنط اساسا
مين بدك يعني .. مين راح يعبيلك الورقة لتضهر ؟
هالة والملك ؟
هولي راحوا مع اللي راحوا
هولي مغتربين بالبرازيل هالة والملك
وكمان آخر ما في غير هالمطار العظيم
يالي بيلخص البلاد
بدهم يفتحوا فوقه .. انشالله بس ما يفتح مطار حالات
احلى ما نكون انتقلنا من حالة واحدة لاكتر من حالة ... لعدة حالات
لعدة حالات وكلها من نفس الطينة
والعقل اساسا... طينة
وهالخلقة راح تبقى فينِه
والطينة العامة اللي راكبة
اي والله زينة
ايّا زينة هه !
من عند قيصر عامر كمان
ويتبع
ـ

http://www.youtube.com/watch?feature=player_embedded&v=gx73Dc3JrgY

.
الله يساعد الله يعين الشرايية ع البياعين
م العالم كلّا شرايية بس مش كلّا بياعين
الله يساعد الله يساعد الله يعين
~.~.~.~.
اذا كل العالم شرايية وجزء منهن بياعين
اطرح تاني جزء منهن بتعرف مين هنّي الباقين
الفلا بتطلع بالباقيين الله يساعد الله يعين
~.~.~.~.
بياع اللي بيبقى شرّا واشترا من غيره بياع
بدو يتعبى بغير مرة بشرايي مش بياعين
الله يساعد الله يساعد الله يساعد الله يعين
الله يساعد الله يعين كل من ليس بياعين
~.~.~.~.
عرفني من ايا جزء عرفني عن نفسك مين ؟
no problem اذا شرايية في problem اذا بياعين
الله يساعد الله يساعد الله يساعد الله يعين
~.~.~.~.
بياع معبى ببياع عم بـ يكيّل عم بـ يزين
الاول بـ بيعو دراق التاني بـ بيعو بنزين
بحر فلوسو مدّو وجزّرو ونحنا لّطينا بالبسين
الله يساعد ويعين الله يساعد ويعين
الله يساعد الله ويعين
مجموعات الشرايين مش مقدورن
الا يسبو كلمة بتبدا بحرف الشين
مش مقدورن الا يسبو كلمة بتبدا بحرف الشين
.