حبطرش ؟؟.

نفس السولافة ونفس القصة ,, الدولة متخوزقة ,, وبترمي فتاشات رفع اسعار المحروقات ,,
كل رئيس وزراء جديد بعيد اسطوانة الميزانية المخسوفة ,, او بيان لازم يكون رفع اسعار المحروقات من اجل دعم الخزينة ,,
دخيل الله ,, انا شو خصني بالخزينة ,, انا بعمري ما كنت موظف حكومة غير سنتين خدمة العلم ال طلعوا من جنبي ,, والمصيبة اني خدمت بالجيش ,, والغوا خدمة العلم ع طول ,, الطنطات انبسطوا وراحت ع شواربي ,,
طيب اذا الحكومة بتحرث علينا واحنا بندفع كل شيء من الرواتب الى المياومات الى حفلات الاستقبال والبطيخ الاسود ,, لشو بحملونا جمايل اسطوانة الغاز ورغيف الخبز ,, لشو ما يراقبوا التجار الي اكلوا الاخضر واليابس وشربوا دم الغلابا ,, ودخيل عيونكم كم الف سلعة رح يطير سعرها ,,,ومين رح يراقب الاسواق والحكومة نايمة بالعسل ,,
اذا الميزانية مسطوحة ,, روحوا شوفوا مين سطحها ,, هاتوا الذهبي ,, وعوض الله وعوضين ,, وشلة حسب الله ,, ورجعوا اموال الخزينة ,, حاسبوا الحرامية واللصوص بعدين فكروا بمشاكل الناس ,,
المصيبة مو هون المصيبة بمجلس النواب ,, صار اسمو عندي مجلس ""يا دادا "",,
مجلس يا دادا صار اسمو هيك بسبب واضح ,
كلنا بنتذكر اغنية سميرة توفيق " رف الحمام مغرب مجوز ولا فرداوي " سميرة الله يطول عمرها ,, كانت تغني هالمقطع ,, والكورس الي كله زلم ماشا الله عليهم بشوارب بتشيل اربع تيوس ,, الكورس كانت مهمتة يرد ع الست سميرة بجملة وحدة بس " يا دادا ,,
الحكومة بتغنينا " رف الحمام مغرب ,,ومجلسنا المنتهي الصلاحية مهمته يردد " يا دادا ,
ارحم يا طراونة ,,تراك غايب فيلة ..
صباح الخير يا اردن الشومات .....
صباح الخير يا سميرة