شلونكوا

شلونكوا..

اول ناس راح نسلم عليه ونحكيله شلونكوا.. هو قايد حكومتنا الرشيده ابو الرفاعي
يمسيك بالخير شلونك شخبارك ان شاء الله الصحه تمام ومبروك الحكومه وسنة خير عليك يا رب

شو هالنشاط هذا دولتك من اولها نزلتوا بقوة وفرجيتونا العين الحمره .. احنا والله اتفائلنا فيك وفي حكومتك الرشيده وقلنا هذا الشبل من ذاك الاسد
وما اثلج صدورنا قرارك في بداية تسلمكم للحكومه بمنع مجموعة الاردن دبي كابيتال التقدم للعطاءات الحكوميه كونك مدير هذه الشركه .. صراحة من النادر ان يفعلها مسؤول وفرحنا كثيرا

بس يا دولتك انا ماخذ على خاطري منك ..
احكيلي ليش ؟؟
ايوا حكيتلي ليش
شو هالقرارات الي من اولها ... توقعنا يكون لون عين حكومتك علينا ابيض او ازرق بس مش تفرجينا العين الحمرا من اولها

انت فاهمني شو بقصد
بقصد صندوق المعونه الوطني ..
ايوا صندوق المعونه الوطني . ناس مساكين وماكلين هوا ولولاهم مش محتاجين ما سجلوا اسمائهم وكسروا انفسهم
قرار حكومتنا الرشيده خربط كيان الصندوق

القرار بحكي انه العائله الي عندها حدا سنه القانوني يستطيع العمل فيه توقف عنها المعونه ... طيب معك حق بس في ناس صحيح انه بتقدر تشتغل بس يمكن يكون بدرس او مسجون او مريض
الشغله مش في العمر يا دولتك

ويعني ما لقيتوا من هالمؤسسات الحكوميه شغله تتشاطروا فيها غير صندوق المعونه الوطنيه .. ما السفراء قدامكوا خففوا من نفقاتهم وميواماتهم الي على الفاضي

خففوا من السيارات الي بتنصرف لفلان ولزوجته ولاولاده
خففوا من الطلعات الي ما الها طعمه
خففوا من الاثاث الي بتجدد في الوزارت

انت ادرى يا دولتك مني بهالشغلات ..

اتركوا الفقراء في حالهم ولا تحاربوهم في المعونات .. ربنا وحده الرزاق وهو صاحب العون والي الفقرا بتطلب معونته مش منكم يا دولتك

على الاقل يا دولتك لو وضعتوا حلول غير هالحل وبعدين لغيتوا المعونه .. وفروا وظائف للاشخاص الي عمرهم بسمح الهم للعمل

يا دولتك هالمره بس .. غض البصر عن الفقراء وابلش في الروس الكبار . حتى هيك بنوفر على الحكومه اكثر من لما نبلش في الفقراء


دولة الرئيس علي بن ابي طالب رضي الله عنه قال .. لو ان الفقر رجلا لقتلته

واخيرا دولتك يعطيك العافيه من اولها فرجيتنا العين الحمره
ومره ثانيه
شلونكوا..