حبطرش ؟؟.

زمان كنت اشم كل طبايخ الحارة برمضان
اليوم خشومي مسكرة ما بعرفش ليش ممكن الطبخات صار مالها طعم ولا ريحة ولا لون مثل قرارات الحكومة وممكن خشومي انشطبت وبطلت تشم من الدخان والسجاير .
على كل حال السيجارة عندي بعد الافطار بتساوي كل العالم .. وممكن ارتكب جناية علشان سيجارة بعد الافطار .
الناس تغيرت وصارت بلا حس ولا زوق ولا همة ولا ما يحزنون ..
في عام 1932 كنت مارا من وين من عند المستشفى الايطالي بعمان يعني من شارع بارطو .. المهم كنت بدور بالبالة عن حيشاكو كندرة نمرة 47 الكندرة هاي ليست لي لكن وصاني عليها واحد صديق عزيز .....كانت السنة سنة توجيهي ..
واحنا كنا شلة همل طول نهارنا بالقهاوي وبالسينمات او بنلعب فطبول بملعب توب تن بالهاشمي او بنروح نحضر مباريات الاهلي والجزيرة .
في النهاية لقيت كندرة لونا شمامي وسعرها 1.25 لاغير . لفيت الكندرة بجريدة الاخبار التي كانت تصدر وقتها وطلعت من جرباني سيجارة اف . ال يعني فيلادلفيا احسن دخان بالعالم .و نتعت الكندرة وكأني ناتع بطارية صواريخ ارض بحر وذهبت الى سرفيس خط 15 عند المدرج الروماني ايامها ودفعت 3 قروش وركبت مرسيدس ابو جمعة طراز 190اس ال ...ووصلت نهاية الخط الى صديقي وناولتة الكندرة على راسو وناولني قيمتها ..
المهم بعد هيك قلت له لمن القوارب البحرية هاي واقصد هنا الكندرة .. ان شاء الله مش الك او لابوك .. قال لا ..انها من اجل عمك ابو خليل .. وابو خليل لمن لا يعرف كان عم او خال او جوز خالة او ابن عم او خال ابن خال جدك لكافة طلاب المدرسة الهاملة والكندرة كانت هدية له لكي يتواسط لصديقي ليعيدة على المدرسة ويحضر على انه ولي امرة .
ابو خليل كان يملك بقالة نشترى منها راحة وحلقوم وبيبسي وساندويش مرتديلا وحلاوة . . على دوار نقاوة ونقاوة او عبدة نقاوة كان يبيع جرار غاز على الدوار مقابل عبد الاحول الحلاق الخاص بحضرتنا ايامها
عند ابو خليل ..كنا نلطش بزر وقضامة وحلقوم وكعك اكثر ما نشتري كنا لصوص صغار ..
ابو خليل كان ابو المدرسة كلها ..
قبل ايام قرأت اسم ابو خليل في الجريدة ..
ابو خليل مات
حزنت كثيرا وتمزق قلبي وكانما المدرج الروماني كله اختفى او ان جبلا من جبال عمان لم يعد له وجود .....
ابو خليل مات ..... سامحنا يا ابو خليل على كل سرقاتنا الصغير ..
رحمك الله ابو خليل .. .