اليوم وبالجريدة ... وزير الطاقة .. قطيشات بقول انه يدرس رفع اسعار الكهرباء ...
واللجنة النيابية تعترض ... وتطالب بخفض اسعار الكاز والغاز وتعارض رفع اسعار الكهرباء بشدة....
يا صباح يا فتاح يا رزاق يا كريم .........................................
الوزير بقول ان الغاز مدعوم والكاز شرحو ....... كيف مدعوم والنفط بكل العالم طاح طيحة البين ....
كيف مدعوم واحنا بنوخذ الغاز المصري الي طاح حتى بمصر وكيف الكاز مدعوم وسعرة ارتفع اضعاف مضاعفة ...وليش ما نزلت اسعار الكهربا لما حولو محطة العقبة للعمل على الغاز بدل النفط مع انه الغاز ارخص واسهل للنقل وما عليه كلفة مثل النفط ...
وليش الكهربا ما نزلت لما نزل النفط ..........................
اما الكهربا .... فسيكون قرار الرفع كالتالي ...
الوزير نفسة سيقول ان القرار مؤلم ولكن لا بد منه وانه سيتم مراعاة احوال الاسر الفقيرة وطبعا خمس تالاف مادة رايحة يزيد سعرها ولو كان يتم تصنيعها على الطابون وما بتعرف الكهربا ...
اما كيف بدهم يراعو الاسر الفقيرة... فكما يلي : لن يتم رفع سعر الشريحة الاستهلاكية لحد 160كيلو ....
160كيلو بتكفي الاسر الفقير وبتزيد ... كيف ممكن نستفيد من ال160 كيلو ...
الوزير سيشرح لنا ذلك ... من المعلوم ان 160 كيلو بتكفي تضوي نيون واحد لمدة 6 ساعات وبس............ ولكن مش مشكلة وزارة الطاقة عندها الحل ...
الحل يا مواطن كما يلي : شوف بتشغل البيت كله على ضوء واحد لكل الغرف يعني كل دارك بلمبة وحدة والطريقة الذكية لذلك هي ... جيب سلك كهربا بطول 42م وركب لامبة توفير طاقة عليه واشبك بفيوز الكهربا الي بغرفة القعدة وبعدين اقطع التيار عن باقي ... المنزل ... واذا بدك مثلا تروح الحمام اسحب السلك على ظهرك وروح واذ بدك تنيم لعيال اسحب السلك ونيمهم وارجع للصالون واذا بدك الولية تعمل صحن سلطة اسحبلها السلك وظلك حامل اللمبة حتى تخلص السلطة ....
وما تتفلسف وتقول بدنا نشوف اخبار ونفتح تلفزيون بلاش بعزقة . وانسى موضوع الثلاجة اشتري مي معدنية من الدكان وبلاش مكوى ودي الكوي لعند الدراي كلين وبلاش المكنسة جيبلك سريلانكية .... وبلاش مكيفات بالصيف .... هاتلك مروحة ورق صينية وكش الذبان براحتك ... وبلاش كمبيوتر جيبلك لاب توب وشغله على الخلوي ..... ما احنا عايشين بهامبورغ مش بدول العالم السابع .....عشر .................
هيك بتكون وفرت على حالك فاتورة الكهربا ... بس ما تنسى احمل العداد احسنلك ورميه بوجه شركة الكهربا واسحب الخط الي حكينالك عنة من ساعة جارك على السكيت . واذا جارك طفران وكحيان مثل حكايتك اسحب خط الك وخط لجارك ... والا اقولك اسحب خطوط لكل الجيران ولكل الحارة وبتصير انت شركة الكهربا وببلاش ... بس ما تتحكم بالبشر ........اسحب خطك من كيبل الشركة الرئيسي ... الي عليك عليك ..... لحدا حوش ..................
.. ليش ترمي الساعة بوجه شركة الكهربا لانه يا حبيبي اذا ظل العداد عندك بهلكوك فواتير حتى لو ما سحبت كيلو واحد كهربا بكفي بقولولك قيمة اشتراك مش عارف كم .....اجور عداد مش عارف كم ......رسم تلفزيون ابصر قديش ... ضرائب اخرى الله واعلم كم .. مبالغ اضافية ابصر وشو ربها .....وبعدين بسمطوك المجموع وبسلخو المجموع بـــ16% ضريبة مبيعات وهات حكيها يا ابو العريف ..

وهيك لما ترمي الساعة بخلقة مدير شركة الكهرباء وشلته ... بتريح حالك من خلقة مندوب الشركة الي بقرا العدادات وبتريح حالك من هم ابو كماشة كل يومين ولاثالث داق الباب بقولك تدفع والا بفصل .... لا افصل يا ملعون الحرسة وبس تقلب برجع بوصلها ....
قطيشات نازل يقطش بالناس...... كل يوم بطلعنا بموال بس هالموال المرة هاي مش عالبال ....بنقول ثور بقول احلبوه ....