اقتباس : المشاركة الأصلية كتبت بواسطة أنيسة [ مشاهدة المشاركة ]

♡♡♡ ليه ساكت وداخلك زحمة حكي؟؟♡♡♡ ♡♡♡ ليه ساكت ؟؟ كم يؤلمني هذا السؤال!!

بعدني بموضوع بحكي عن رحمة الوالد ..
زوجي بس حكالي هالخبر المؤلم ، لليوم بيستغرب ردة فعلي ..
كنت نايمه .. صحاني بحكيلي ترحمي على عمي ،
سألته : أبوي مات ؟ ( كنت قبل وفاته بشهرين بالأردن نتيجة اصابته بالجلطة وسألت الله يختارله الأحسن ، كان في حكي يبترو ئيده وقدمه نتيجة رقدتو على السرير وجلطات متتالية الله يرحمه صبر ع المرض هو ابوي صبور جدا )
سألت الله ياخود امانته وهو بكامل جسمه وكرامته ، وربنا سبحانه وتعالى حفظ رجليه وئيديه اللي ما كانن ولا صلاه يتأخر يوصل المسجد حتى الفجر بعز الثلج ، الله يرحمه
حكالي زوجي : نعم ترحمي عليه وكان خايف جدا شو حعمال يعني وهو حزين جدا لانه بيحبه ابوي كان درويش الكل بحبه ..
ردة فعلي كانت اني قمت وجلست على الكنباي مكان ما بئعود باستمرار .. صفنت .. وترحمت عليه ، وبس !!!!
باستمرار بسمع كلام اني بحكيش اشي ..
ولك احكي شو رايك .. طيب شو سار معك ... انت راضيه ؟
وبرضو بضل ساكته ، هو بيني وبينك مو مقصوده اني اسكت
بس ما بعرف شو احكي ! او بالأحرى ما بعرف ليش احكي !!
عندي اشي بيدحك .. بيسلي .. موقف شغله بحكي
اما اموري الذاتيه الداخلية ومواقفي تجاه مواقف الحياه ، فالواحد يخليها اله افضل لانها بتعنيش غيره
ليش نحكي ؟
حزينه ؟ عندي مشكله ؟
طيب اللي بدي احكيله عندو اسبابه للحزن وعندو مشاكله هو نائصه ! بعدين بشو بدو يفيدني ؟
امي بس كنت ارجع من الكرك آخر الاسبوع تسير تجرجر بلساني ولك احكيلي شو بسير معك ولك اشكيلي مشاكلك
احكيلها اولا فش عندي مشاكل بعدين وحكيتلك عندي مشكله شو بدك تعمليلي مثلا يا فطوم !!
بدي ازيد همها وبس مشكلتي انا وانا مسؤوله احلها
الواحد يحكي بينو وبين حاله لربه ويتوكل ع الله ، وبس لشو الحكي للناس عنجد ؟
بسمع كتير اني قاسيه ولا مباليه لاني مئضيتها اما اضحك او صافنه بدون ردات فعل
هو جواتي بكون في ردات فعل مو وحده بس بعرفش اطلعهن !!
موضوعك حلو وحساس ككل اختياراتك اللي بحبها
لكن انا مع السكوت فيما يخص امور الانسان الشخصية اللي بينه وبين حاله
اما امور بتعني جماعه ، لا الحكي اوجب
عموما يسعد مساك وكل الخير بحياتك يا سنسن