.........
**************
الرابط : فولكلور
بقلم: صالح صلاح شبانة
************************************************** ****************************
يا حامل الزمن عَ ظهرك ، ولافف التاريخ با لأكفان،
وعمر الزمن ما استنى حدا ،
واللي ما بيلحقه راحت عليه ، وعاش العُمُر ندمان
شو أخذت من الزمن يا عم ، غير الوجع والحرمان ؟؟؟
ولسه بتنادي يا مجلخ السكاكين ،
يا مين يجلخ سكين ، بشلن ولاَّ بقرشين ،
ولاَّ بتعريفه حمرا !!!!
وبطلت ها لعمله تنفع ، وسقطت من الجيبه ومن العين ،
آخ منك يا زمن آخ ، خوّان وما أنت أمين ،
وبتحمل دولابك عَ ظهرك ، وبتمشي في دربك تايه حزين ،
يا ساتر الولايا ، ويا رازق لِعّيال ، نظره منك يا كريم ،
وظليت تحمل دولابك عَ أكتافك ، صعب الزمن عليك ولاَّ هان
*****
مجلخ سكاكين وشباري ومقصات ،
وبقينا زمان نذبح الديك أبو عُرف أحمر ،
ونطبخ مفتول ومجدرة وكرشات ،
وبعد العشا نسهر عَ الشاطر حسن ، والغوله ،
ونص انصيص في الخم ، وجبينه ست البنات ،
وننام عَ حلم بكره ، يا ترى بكره شو حامل معه ؟؟
وبكره سله مغطيه مليانه مفآجأت .
*****
والشباري بقينا نحملها نتباهى فيها ، يوم بقت الزُلُم تتباهى بالسلاح ،

قبل الشوارب ما تصير ملط ، والشباب يصيروا أنعم من البنات
ويصير اللي يخلف مهما يخلف ، رزقة ولايا ، وكلهن ستات ،
لا بتفش القلب ، ولا بتحمل ذكر من بعد الممات ،
والشباري بقينا نجلخها للحاجه ، تيزهى الخسر وتتباهى الدمايه ،
ويفرح السلحلك ، ويضحك الجفت أبو عيون مبحلقات .
*****
وبقى الحلاّق يجلخ لِمّواس ولِمقصّات ، قبل ما تصير الخنفسه موضه ،
ويربوا الشباب شليش و كوكو ، ويتمكيجوا مثل البنات ،
لمّا بقيت تعرف جنس اللي قدّامك ، ذكر خشن ، ولاَّ أنثى مثل سكر النبات ،
وبقى الزمن يا عم يدور ، وأنت مع الزمن بتدور ،
وان سبق الزمن وبقيت ، هيهات وهات ،
قام الزمن طلع عنك ، عدّى وسبق خطوات وفحجات ،
وحط خطوطه عَ وجهك ، وغزا الشيب ها لشعرات ،
دار الزمن يا عم مثل دولابك ،إحمل عزك وذكرياتك ،
احمل آمالك وأحلامك ، أحمل تاريخك ، واطوي راياتك وأعلامك ،
*****
سكاكين بطلنا نجلخ ، ما ظللها ضرورات
ديك أبو عَرف أحمر ما عنا ، وصرنا نشتري الجاجات مجمدات ،
شباري بطلنا نجلخ ، صرنا نمضغ علكه ، وعلبة مطريات ،
شوارب ما ظل نحففها ،وما عدنا نستعمل لِمّقصات ،
وزمانك يا حزين اندحر .... ولّى ومات ،
احمل دولابك ويا لله عَ المدرج الروماني ،
حطه هناك في المتحف الشعبي ، ولوقف تحسر وازفر آهات ،
زمانك راح ، صدقني زمانك راح ، مضى وصار ذكريات ،
وعُمر اللي راح ما برجع ، مضى اللي مضى ، راح اللي راح
ومات اللي مات
[email protected]