|
أحــمــد الـــصـانــــع .... }
[ أحمـــــــــد الصــــــــانع.] شاعرٌ ألهب القصيدة بلهيب العواطف المتأججة.. كتب الكثير من القصائد الشعرية,,وتداول ها الكثير بحق سيطرتها على عقول وقلوب متلقي شعرهـ.. قد يردد البعض كثير من آبياته الشعرية..وقد لايعرفوا أنها نتاج فكرهـ.. . لا عجب في ذلك..فـ إحساسهـ الصادق,وشتاتهـ المنثور على الورق,جاوز آفاق الروعة إبداعا.. فإستحقـ وبجدارة لقب.. [ صانــــــع الشعــــــــر] . اتمنى للجميع جولة ممتعة في خميلة قصائدهـ.. \ / \ : ودِّي أموت .. اليوم ... وأعيش باكر وأشوف مِنهو .. بعد موتي فقدني ..! ومِنهو حَمَلني لِين .. ذِيك .. " المقابر " وأشكر أنا .. كِل من كَرَمني ودِفنِّي وبَشوف .. يرثيني أنا كَم [ شاعر ] ..؟ ومِنهو تركني .. وما كِتَب شَي عنِّي شِخصٍ تعنَّى لي .. مع إنَّه .. - مسافر وشخصٍ قِريبٍ .. وآنا مَيِّت طعنِّي !! وشخصٍ يمثِّل دمعِتَه .. ما هو قادر ! وشخصٍ تِطيح دموعه كِل ما ذكرني ومِنهو مِن أهلي فـ العَزا كان حاضر ؟ ومِنهو دعى لي في " صلاته " ورحمني ومِنهو بنى [ بإسمي ] سبيل ومنابر ومِنهو . . . يفز قلبه .. إلا مِن لمحني ومِنهو عشاني : طول الأيام ساهر ..! ومِنهو ثلاث أيام .. راح وتركني ..؟ ومِنهو يرتِّب .. - غرفتي .. / والدفاتر وإن شاف ( صوره ) لي مات وحضنِّي يالله عسى .. ما تغفى كل المشاعر ويالله عسى .. ما ينصِدِم يوم ظنِّي خايف يروح العُمر .. وأكون خاسر وإن طار طيري .. ما يفيد / التمنِّي وخايف يجيني وقت : أكسِر خواطر إن دارت الدنيا .. وزماني كسرني ومدام هذي الدنيا .. صارت مظاهر وكِل مَن على كيفه .. وجَوَّه يغني [صحيح مُسلم .. لكن : الهَم كافر كل ما بغيت أضحك يهددني حزني ] الضيق وافي .. والحزن حيل وافر والجرح أكثر شي .. شفته يحبني !! عايش وميِّت بين .. ماضي و حاضر والصبر [ مفتاح الفرج ] ضاع منِّي قل وش تبي وتتركني يا حزني آمر مسكين فرحي / تصدِّق إنَّ وحشني !! ( شاعر ) ولكنِّي .. ماني بـ شاعر ودِّي أموت اليوم .... وأرتاح منِّي !! : يتبــــــع ... |
رد: أحــمــد الـــصـانــــع .... }
" تعريفـ المُحَـال " : جاني واحد قال : بسأل كم سؤال وقبل يسأل قلت : أنا ماني خبير ! قال: جاوب بس , يا ولد الحلال وكل كلمه حِطَّهَا .. فبيتٍ صغير قال نبدي : شنهو تعريف المُحال..؟ قلت : خَل الكلمهـ فـ الشطر الأخيـر ..! القهر : إن شفت دمعـات الرجال والوطن : ( إنسان ) .. مِتغيِّر كثير والطفل : لعبه على شاطـي الرمال والأمل : إحساس في عين الضرير الوفا : [ قلبين ] .. يجمَعهُم حلال والرَجُل : اللـي علـى أهلـه يغير والرجا : لا قلت : للواطـي تعال والفشل : مدري .. ولكنـه مرير الشعر : في وقتنا .. بدر وطلال وكان أوَّل : حيـل يعجبنـي جرير ..! والغلا : إحساس إلى حَـد الخيال والعِشِق : لا شفت مَعشُوقِك تطير والجفا : إعكس مفاهيم / الوصال والوَصِل : يعنـي تأكَّـد فيك خير والعقل : تِسْفَـه أقاويـل الجهال والجهل : إن قلت عن نفسك كبير والخطر : لا صار ما عندك مجال والبلا : إن صرت معدوم الضمير والعجب : لا صرت تسأل منهو قال والتعب : إن كنت تِبْحَثْ عن مصير الغنى : بالنفس ما هو راس مال والفقر : من كان .. بأعماله فقير يكفي يكفي .. أسئله إنهي الجدال ويالله علمني عَن .. السِّر الخطير ما أبي تضرب لي في غيرك مثال قول : عنِّك وإعتبر سِرِّك في بير جات طعنـه مِن جنوبك والشمال يعني وضعِك بين مِن حُولك خطير صاحبـي وإن ضاقت بعينك ليال لك فرشت القلب مفروش الحرير في [ بلاد الحلم ].. ممنوع العقال والمصيبه الشعب ما أختار الأمير وما ألومك .. كان شدِّيت الرحال دام بيتك جرح / وفراشك حصير هذا تعريفي إلى كلمة : مُحَال شي ودِّك فيه ولا يمكن يصير ..! يتبـــــــع .. |
رد: أحــمــد الـــصـانــــع .... }
: جيتني " نادم " من الدنيا تصيح ما تنام الليل وأدري ما , ربحت ! شوف وش سوى عنادك ؟ يا جريح لا [ مريِّحني ] .. ولا حتى إسترحت ! من فتحت الباب .. جاني منْه ريح .. طرت من إيدي وأشوف إنِّك ( فرحت ) !! لا تصدِّق .. كل من جاك بـ " مديح " .. من عدوي , ياما واللــه إنمدحت ..! شمعة الفرحه من أخطائك ..- تسيح ! ( الغَرَق ) محتوم لك .. مهما سبحت !! منظر " الفرقا " .. ترى جداً [ قبيح ] !! مو نصحتك ؟ ليه يعني ما إنتصحت !! صرت في وصلك عن عيوني شحيح .. إنعمت عين الوصل .. وينك ! سرحت ؟! إعترف في غلطتك ..خلك " صريح " .. لا تكابر بـ الخطا دامك جرحت !! كان ودِّك في فراقي . . تستريح ؟ بسمَع الموضوع كامل لو سمحت ! خنتني ! وشلون ؟! علِّمني الصحيح ! وين عنِّي رحت / عنِّي وين رحت ؟ كنت أظنِّك .. من عيوني ما تطيح لين في " عيني ".. إرتفَع غيرك , و .. طحت !! يتبــــــــع ..... |
رد: أحــمــد الـــصـانــــع .... }
: في عيوني , وش يساوي غيرك إنت ؟ ودّي آخر شي أشوفك . . و ( أنعمي ) ! أدري إن ضاقت عليك الدنيا خنت وآنا . . . . أخون الدنيا لك يا آدمي ! جيت عندي وبْـ حمى قلبي إستعنت ليه تطعني .؟؟ . . . . و فيني تحتمي ! حِسْ مَرَّه وحدَه في جَرحِي لاهنت إرمِي طَلقَه . . وحِسْ بـ اللي ينرمي كيف ترميني وعلى [ قلبي ] زبنت " البلا " . . لا صار ضدّي محزمي كنت قاسي وللأسف مايوم " لنت " أنتمي لك . . وإنت لي ما تنتمي ! كنت لي قبري وأنا فيك إندفنت جيت لك كلّي ورجع لي معظمي كنت لك واحد وكل الناس إنت كنت صوتي كنت شوفي ونْسمي أذكر إنيّ كنت بين إيدك وصنت وإذكر إنّك في جروحي " حاتمي " ! أدري إنّك في غيابي . . . ما حزنت و رغم هذا . . . تدري إنّك ملهمي كيف أضمن لك شعوري وماضمنت من كثر { دقِّك } - تفكّكْه لْـ حمي لك عقل يوزن [ بلد ] بس ما وزنت الأمور . . . . , إللي تفوّر لي دمي ! في زوايا البيت وفي شعري سكنت وفي حضن " أفكاري " دايم ترتمي آهِ مِنْ قِيدِكْ . . . . وماهو قِيد كنت آهِ مِنّك , كِيدِكْ ( أَدْمَى مِعْصَمي ) ! : يتبـــــــــــــع ... |
رد: أحــمــد الـــصـانــــع .... }
..... صار ياكِلْهَا بشر ! ..... قصتي قِصَه مُفيـده وقِلتْ : أكتبْهَا بسطور ويا عسى مِن كانْ يقرى مِنَّهَا .. ياخِذ عِبَر مغفره وذنوب , والساعه بلا تُوبَـه تدور السنه صَارتْ سَريعه حِيلْ , وأحْسِبْهَا شهر عِذتْ أنا مِنْ شَرْ خَناسٍ يوسْوسْ بالصدور وما بكيت إلا لوجــه اللــه في ليلة قدر تِختصر مَعنى حياتِكْ كيف تبني لِكْ قصور! أحْتِــــرم رايك .. وهذي تُعتبَــر ..... ( وجهَــة نظر ) ! زين طيِّب .. دام تِدري إنَّ لِكْ رَبٌ غفور ليه ما صَلِّيتْ لَجله وما رفعت إيدك شكر!؟ حَدِّث العاقِلْ بمَا يُعقَل ..وفي قلبٍ جَسُور وإنْ خطيت بحق غيرك روح قدِّم له عذر رافِقْ الشخص المِثالي اللَّي لو تخطي / يثور وإن سِمَعت إسْمَعْ مِنْ اللِّي تِلقى في صَمته " دُرر " وقبل تِسأل عَنْ حياتي وكِيف وجهي شَع نور خلْ كلامي لِكْ وصيَّه وخلْ بعد عِندكْ خبر ما نالْ في الدنيا أحَدْ يا سَائلي غير (الصبور) والدليل إنِّي صِبرتْ .. وكانت أيامــي تمر لا تقول: الحَلْ إنِّكْ تِلقَى لِكْ,عاشِقْ غَيور إنْ حَبِّتِكْ عِينه ترى .. ما حَبِّتِكْ ........ عِين الدهر !! مِثلِكْ أوَّلْ كان حَالي وضِيقتي ونفس الشعور كِنت أقول : شمعنى قلبي في مشاريعَه خسر ما دريت إنَّ الغِيابْ أحيَان أفضَلْ .. مِنْ حضور لِين شِفت " الشمس " تشرق بعد ما يغيب ( القمر ) وما دريت إنَّ التواضُع كنز / ومَكرُوه الغرور لِين شِفت إنَّ الغِنى .. في الآخِرَه مِثل الفقر !! كِنتْ غـافِلْ في حياتي وكِنتْ أجْهَلْهَا الأمور لِينْ ربِّي له هدَاني .. وصِرتْ أدَوِّر لِي أجر لا تقول: أعيش يُومي دامي في عمر الزهور منت ضامِنْ عُمركْ الباقي .. وقَطَّافْ الزهَر قبل لا تبدي الخطِيئه وتبْنِي لِذنوبك جسور خافْ مِنْ ربِّكْ وفكِّـر في وعَد يُوم الحشر مَهْمَا كِنت إنسَان " راقي " وتعشِق أنواع البخور التراب اللَّي يضمك بعد مُوتك ........ والقبر !! ياما قالوا الناس : خايف وقلت : ما فيني قصور بَسْ شِفتْ إنَّ الشَّجَاعَه مَعنى ثاني للخطر إيهـ خافْ وكُونْ سَالِم دام هالدنيا بحور ! والبحر مَهْمَا وفالِكْ طبعَـه ( غدار ) البحر وللشجر إن شفت هامه هذا مِنْ طيب الجذور يعني أعمالك جذورك هذي هـي بالمختصر القضيه: ما هِـي شخصٍ خالِفَـه شِرطي المرور البشر في الدنيا هذي . . . صَار , ياكِلْهَا بشر ! يتبــــــــــــــع ... |
رد: أحــمــد الـــصـانــــع .... }
مِـنْ جديـد .. بغيبتِكْ
كِلْ شَيْ , على ما هُو عليه أجي مِسْرع إلى ذاك المطار , ويرتبك نصفي .. ونصفي الثاني يتسائل عَن اللِّي صار و.. أخطائي تروح شلون عَنْ عيني .. وتبدِّل قوِّتي بـ ضعفي !! ولا بـه شـي يستاهل عشانـه .. تبدي إيذائي .. ( مسافر ) دُونْ ما أدري وحِزني داخِلي مخفي أبيـك الحيـن مـو باكـر تِحلِّقْ فوق أجوائي مطار القلب يتحرى رجوعِـك , غيبتِـك تكفي أبكتب لِكْ ولا أقــدر على .. التعبير وإملائي غيابك مـا رحَم حالـي وحرفي آآآه يا حرفي تلعثمت , وعجزت آخذ في وقت البُعد إجرائي أنا كلِّـي عَطَشْ ضامـي أعيش بغيبتِـك حتفي لأنك ساعـة الضيقـه هواي , وبالعَطَش مائي أحبك يا [ وَطَنْ ] غالـي عَليْ وحَضْرتِي " منفي " ..! كفايـه لا تِشتِّتْنِي تعـال .. وجَمِّـعْ أشيائي !! وَطَنْ شنهو وَِطَنْ .. إلاَّ عُيونِكْ في لُغة وصفي ..؟ غريبه شلونْ تتركْني .. وإنت بداخلْ ( أحشائي ) ! ( ثلاثْ أيَّــامْ ) تهجرني ولا بيَّنتْ لِكْــ نزفي ودُواي اللِّـي تِكاثرْتَـه عَلـيْ وصِرتْ لِي دائي ( ثلاثْ أيَّــامْ ) ما نامَت عيوني وما قِدَرتْ أغفي !! لي اللـه كِلْ ما حُولي غريبْ وعَالَمِي .. نائي ( ثلاثْ أيَّــامْ )وأنوار المدينه يا الغلا تطفي وتِعِمْ الظَّلمَه فـي قلب الشوارع وأفقِدْ أضوائي تِصَدِّق حتَّـى بسماتـي .. أهَلِّـي فِيها وتِقفِّي ! تعـال ولَمْلِمْ جُروحـي ورَتِّبْ فُوضَة أجزائي يجينـي الجَرَحْ مِنْ إيدكْ .. وأصْفِقْ كَفِّي بكفِّي أعَزْ أحبابي يطعَنِّـي ويداوي الطَّعْنَه أعدائي !! ( ثلاثْ أيَّــامْ ) تِطْعَنِّي وأنا أشِيلِكْ على كتفي .. كأنْهَا طَعنِتِكْ " ضِيفٍ " وقلبـي ..... حَاتِمْ الطائي !! : : إرجع حبيبي لديرتِكْ عمري بدونك ما أبيه يتبع .. |
رد: أحــمــد الـــصـانــــع .... }
شكرا دموع القمر على الكلام الجميل شـكــ وبارك الله فيك ـــرا لك ... لك مني أجمل تحية . |
رد: أحــمــد الـــصـانــــع .... }
ما تغيَّر شي . . . لكن ! صار " فاضي " هالمكان . يعني إنتَ شفت قلبي ؟ طحت مِنْ عيني و / عينه [ كان ] لك قلبي - مدينه ولاحظ إني قلت : كان ! يعني إنتَ الحين واحد :: خارج حدود [ المدينه ] :: ليه مستغرب كلامي ؟؟ وليه أعطيك الأمان ؟؟ وليه تَكْذِب في كلامك ! العذر وينك و وينه ؟ ما ألومك .. كان " قلبك " ثارت أمواجه و / خان الخطا منَّي , لأني . . . : صرت في بحرك ( سفينه ) والسؤال اللَّي كتمته ..؟ وما نِطَق فيه اللسان { كيف إيدك إطعنتني وآنا أحْسِبْهَا أمينه ..؟ } جرحي .. ما يرضيه قلبك .. لو يجي كلِّه حنان ! لو - تبوس الجرح فيني . ولو - تقبّلْهَا إيدينه . يُوم أحبك ؟, قلت كلمه : ( يكرَم المرء أو يُهان ) وإنتَ قلبي ما كرمته ! وما قدرت إنِّك [ تهينه ] عزِّتي .. ما هي جديده آنا " شامخ " من زمان إغسِل إيدك من رجوعي .. وروح , يا إبن اللذينه طاب خاطر قلبي منِّك . . . وهذي الفرقى رهان حتَّى لو قلبي يحبك . / - ربِّي . . بفراقك يعينه ! تدري لما قلت أحبك ؟ قلت .. وما عندي ضمان . وإختياري كان ( خاطىء ) تجربه بالحييييل شينه كنت تخطي .. وكنت أسامح .. مرَّه : مرتين : وثمان ! أدمَح الزلّه - عشانك .. وأكتِم أنفاس .. الغبينه كنت أحبك ’ كنت أعزّك ’ والغلا فيني جبان خاف تزعل لو , ألومك , ضعت ما بينك وبينه في عيون الناس " عادي " بس في عيني ؟ / جنان وكان قلبي من يشوفك تفضحه . . نظرة حنينه . . ماني أوَّل من يحب ..... . ومنتَ آخر شخص . ..... خان ! المحبه في زمانك ؟ بحرها ^ من غير مينه ^ الفشل .. كان النتيجه وأعتقد آن الأوان , أبني - مستقبل حياتي . و - أنسى قصتنا الحزينه . خطوتي الأولى ( غيابك ) راح أطبّقها عشان : " يبكي قلبك لا فقدني والندم .. يملي سنينه " جاي تسأل عن مكانك !! هو { بقى فيني مكان ؟ } الله يرحمها المشاعر . . . اللي كانت لك رهينه . قلت لك قلبي [ مدينه ] فيها لك :: حشمه وشان :: لكن إنتَ الحين – أغرب .. شخص ! في هذي المدينه يتبـــــــــع... |
رد: أحــمــد الـــصـانــــع .... }
م ـحال : الحزن في غيبتك له لون داكن .. مات قلبي ويحسبوني الناس حي كنت عايش إيه فـ غيابك / ولكن .. فاقد إحساسي بحياتي وكل شي : مِسكتك " حلم " في " واقع " رفض يحقق أحلامي مثل ذاك السراب اللي خذاني بعيد .......... وما نلته !! عليك اللـه , إرحمني ذبحني . . جرحي الدامي وسيفٍ رافعه بوجهي عشان أرضيك / عانقتهـ أشوفك " طيف " وأتخيِّل وجُودك , وإنت قدامي !! ولكن الغياب أقوى .. صِدمني وقال: ما شفتهـ لي الله صرت لطعوني ( هَدَفْ ) ولطيبتي الرامي أنا [ لا طاعني هذا الزمان ] .. ولا بعد طعتهـ !! حبيبي صَعبه أتحَمَّل جُروحي وعظَّة إبهامي قضى صبري وكل حَلٍ عشان الحُب ؟ جرَّبتهـ إذا لِك يُوم مِتضايق ..؟ أنا الضِيقات أيامي وإذا لِك يُوم تذكِرني ..؟ أنا النسيان زعَّلتهـ وإذا جِسمِك تعَب , حتى أنا خايف مِنْ عضامي ..!! أنا أمري إلى رَبِّي .. مِنْ الصَدمات / سَلَّمتهـ محالٍ ألتقي بنقطه معاك .. وأنصُب خيامي [ ربيعك ] وين يا الغالي..؟ أنا أسمع فيه ما عشتهـ أنا اللي كنت أسهَر لك وأقول: لراحتك نامي غفى بعض التعب فيني وبعضه فيك سهَّرتهـ تِغمِّض جفني بـ خيوط النهار وألمح أوهامي وأرجع أكتشف جفني معك ما يوم غمَّضتهـ تعوَّد قلبي من صُوم اللقا , لا تجرح صيامي لقانا تحسبه ذنبٍ غريبه شلون حلّلتهـ ..؟ وش الحيله .. إذا أفقد دواي , وألمَح آلامي لاجل أوصل إلى قلبك طريق المُوت أسْلَكتهـ وفجأه صرت لك شاعر وعينك كانت إلهامي وكل بيتٍ عجب غيرك لاجل أرضيك بس .. قلتهـ كأنك صَحرةٍ تُورِد غياب // وينكِسِر ضامي دخيلك .. قلبي الضامي .. أمانه ليه كسَّرتهـ ؟؟ يمُوت الحب لا يمكن , أموت ويبقى هُو " سامي " وإذا حُبك مثل ( سِيفٍ ) ......؟ تأكد إنِّي عانقتهـ : أمانه .. كيف تتحمل عيونك لحظة فراقي..؟ وأنا عيني من غيابك حبيبي ( ما تنام الليل ) يتبــــــــــــــــع ... |
رد: أحــمــد الـــصـانــــع .... }
ما هي غريبه إذا في خاطرك تجرح قلبي تَعَـوَّد على النسيان وجراحه سوَّدت وجه الغلا / ويحق لك تفرح والراحه والله أبشرك ضاعت الراحه ملِّيت أجْمَعْ طموحي وحضرتك تطرح والقلب يسأل : دخيلك , وينْ مفتاحه؟ إن قلت [ تعبان قلبي ] جـد ما أمزح الهَمْ دمَّر حصون القلب , وإجتاحه جيتك مثل ( آدمك ) في جنِّتي أمرح وإنتَ .. وش إنتَ؟ أكيد تكون تفاحه ما كنِّك إلا البحر , وما عرفت أسبح غدار طبع البحر .. ما فيـه سبَّاحه وما كنِّك إلا طعوني , وطعنتك تذبح في ذمتك شفت واحد حَب ذبَّاحه !؟ وشلون أحبك وأنسى غلطتك وأسمح؟ مو كل شـي لا تكسَّر تقدر إصلاحه خسران أدري لأنـي ما عرفت أربح يا خلف اللـه , على قلبي وأفراحه ما فيه داعي لعذرك ما أبي تشرح ما دام قلبك خذا من جرحي أرباحه إبعد طلبتك وأنا في خير راح أصبح إن رحت عني تكون أعصابي مرتاحه القافله تسير دايم , والكِلاب تنبح ويا كثر ما به كِلاب بداخل الساحه ! يتبــــع... |
رد: أحــمــد الـــصـانــــع .... }
قساة الكون في عيني وقلبي ما إهتنى وما إلتم قسى هالوقت .. . يا قلبي وضيَّع كل راحاتي جروحي فوق طاقاتي بكيت وفي عيوني دم رضيت آنا على القسوه وضاعت كل بسماتي تعبتْ وما صِدَقْ حَظي وفوق الهم أشيل الهم صغيرٍ في العمر آنا ... وكبيره حيل مأساتي محدْ يدري عن أخباري محد في دنيتي مهتم وحيدْ أمشي مع همِّي وكبيرْ الحزْن في ذاتي سِمَعْ قلبي عَنْ الراحَه واهيَّه مِنْ الوهم أوهم أعيشْ آنا بوسط واقعْ { نهاياتي في بداياتي } ياليت تفيدني الحسره ياليت أرتاح لو أندم صعبْ أرتاح في الدنيا حزينْ بكلْ حالاتي سفينه مِنْ الصعب ترسى واهي مِنْ الموجْ تتحطم أشوف ( البحر ) في عيني , لقيت الموجْ دمعاتي كثير قلوب غرقانه واهي منْ الوقتْ ما تسلم بحر هـ الوقت هَمْ يغدر , وهذا معنى كلماتي يا قلبي الطِيبْ ما ينْفَعْ عشاني ركِّزْ وإفهم أنا ملِّيتْ أعلِّم فِيكْ .. . وإنتَ تزيدْ آهاتي أمانه كان لِي خاطر مِنْ اللِّي صار تتعلم ويا قلبي إترك الطيبه , بعد قصة مُعاناتي يتبع ... |
رد: أحــمــد الـــصـانــــع .... }
إجرحيني لا بغيتي كان لِكْ جرحي إبتسامه المُهم , إنّك تكوني . . يا بعد ذاتي .. سعيده روحي له الحين يالله وإسمعي صوته وكلامه ولا تشيلي هَم قلبي عِيشي دنياك الجديده قولي إنّك ما عرفتي في الحياة , إلا غرامه وقولي إنّك قبل حُبه تمشي في دربك وحيده ولا تجيبي لي طاري . , وتسمعي منّه ملامه سولفي عنِّك وعنّه وصيري عن قلبي بعيده وإنْ بغيتيني تعالي وعوِّضي فيني خصامه وصدقيني في النهايه إنتي وحدك مستفيده دام قلبي من غلاتك ..... إيتفزز من منامه أشهد إنّه حيل حَبك من و ريده لي و ريده وكان همِّي بس أشوفك طايره مثل الحمامه وإنْ فرحتي كنت أفرح وأكسِر بيوت القصيده كنت أشوفك في عيوني مثل ( زرقاء اليمامه ) وين ما قلبك يسافر كانت عيوني تصيده شفتي هذا الكون كله بالرجوله والشهامه لو بغيتيني أبيده .. والله لـ عيونك أبيده كنت أحارب لجل حُبك والقوي أكسِر عظامه وكان قلبي لك أسيرٍ وكانت عيوني شهيده قلبي والله من عرفتك صرت مدري وش علامه كل ما صرتي في عيني شفت نبضاته شديده وقدرك اللي إنحنى لي وقلت: عز الله مقامه عالي قدرك في عيوني وكل ما شفتك أزيده إنتي لو عني تغيبي صارت جروحي يتامه خافي الله لا نويتي ولا تضحي في عبيده كنت أسهر من غلاتك حتى ليلي ما أنامه وإنتي مشغوله بغيري ودُوم أشوفك تحت إيده كان ودِّي بس أحظى بحب قلبك وإهتمامه والشعر عنِّك أقوله وأنتهي منّه , وأعيده كنتي أمنيتي بحياتي وكنتي , في قلبي مرامه وإن كتبتك في حُروفي صارت القصه فريده وكنت أشعِل لك كفوفي لجل أنوِّر لك ضلامه وإن خذيتي العِلْم مني .. تطلع علومي أكيده حتى لما كان يرمي . . . كلَّهَا فيني سهامه كنت أضَحِّي في حياتي لو نوالك بالمكيده ما حشمتي قلب شخصٍ له شموخ وله كرامه وما حسبتي حساب ناسٍ همَّهَا بس النقيده شاعرٍ ما رَد حتى ... على لبَّاسي العمامه وقلبك إنتي صار فجأه والله يا حلوه يقيده في الزمن نادر وجودي ويا كثر فيه الرخامه وصار عادي في زمنَّا الأخُو يقتل عضيده الحديده , في إيديني و القضيه . . إتهامه وإنتي القاضي وطبعاً ما تحسي في الحديده مركبي الغرقان بَسِّك لا تزيدي في حطامه كل ما ألمح نجاتي صارت أمواجك شديده صدقيني - حيل أحبك والوعد يوم القيامه ويل من هو كان يكْذِب وكانت ذنوبه جريده إتركيني لجل عينه .. كان لك حُبه إبتسامه المهم . . . . إنّك تكوني يا بعد أحمد سعيده إنسي اللي صار كله وصيري له منبع هيامه وإن ذكرتيني بغيابي قولي عن روحي فقيده ما أبي من قلبك إلا .. طول عمره والسلامه خَلِّي بالك من زمانك دنيتك هذي عنيده يتبع ... |
رد: أحــمــد الـــصـانــــع .... }
دخول : ما مرتاح من ربعي .. ولامرتاح ! نادوني .. وركضت بـ ليل إيد " الرسن " بيها .. وإيدٍ بها " سلاح " .. عثرَتْ مُهرتي ..! و .. " ربعي " قبل ماطيح واحد قال للثاني : " أبشرك " طاح أبشرك " طاااح " ..!!! لـ كاظم إسماعيل الكاطع وأنا مثلك مع ربعي يا [ كاظم ].. حيل مو مرتاح ..! كأنهم بيد عطشانه .. وكأني بينهم [ واحه ] ! خذا بعض الأسى بعضي وبعضي وين منِّي راح ؟!! وقلبي قاتله حزنه ( سَ قَ ط ) ..... مقتوله أفراحه !! أجيهم .. نيِّتي بيضا ويجُوني في شكل أشباح ! لأجل راحتهم أتعذَّب .. عذابي عندهم راحه !! تصدِّق ..؟! حيل متضايق ( خساراتي ) لهم " أرباح " ..! ضحكت وكانت الضحكه من الصدمات و [ السَّاحه ] ..!! إذا ربعك مثل : ( غابه ) .....؟! أنا ربعي مثل : [ مسباح ] .. وأنا شخصٍ .. عجز يجْمَع ( نَثِر ) حبَّات مسباحه ! وإذا صارعت من أجل القرايب / قوَّة التمساح .....؟! أنا حتَّى البعيد اللِّي يجيني / مااات تمساحه !! زرعت الطيب في قلب " الحجر " وإستغرَب الفَّلاح .. قفل حظي مع ( الفرحه ) .. ألاقي ويييين مفتاحه ؟! تعب : لا كنت في ظلم السجون وضايع المفتاح ! معاك الحق لكن [ العدل ] .. ما فاد مصباحه ! عتب : لا صار يتبشَّر صديقك .. والألم صدَّاح وعدوِّك كان في لحظة سقُوطك , تنزف جراحه !! بحر .. يا موج .. يا شط الصداقه .. كنت لك ملاَّح سفينه كان لك قلبي .. ولكن غدرك إجتاحه ! حرام : إن كان لي واحد وأناديه بـ إسم يا صاااح مدامه " صاحبي " بإيده سقاني .. السِم بـ قْداحه ! سمعت إصياح من عين المراجل ...؟! إي / سمعت / إصياح .. و [ طير المرجله ] في هالزمن متهلهل جناحه !! ( صديقي ) صار معناها بـ عيني .. واحدٍ " سفَّاح " .. لأنهم أغلب أصحابي .. على الطعنات ذبَّاحه ..! وفا شنهو الوفا ....؟! [ شَمعٍ ] كثر ما يشعلونه ساح !! ورمحٍ يصنعه وقتي ( وربعي ) حيل رمَّاحه !! يجي واحد مُنى قلبه .. يشتت فيني [ الأفراح ] !! وواحد ضاق لو يلمح عيوني .. تنام " مرتاحه " !! و واحد قال للثاني : من المُهرهـ أبَشْرِك طاااااح كأن بـ طيحتي يلقى السعاده ..... و طفرة أرباحه !! يتبع ... |
رد: أحــمــد الـــصـانــــع .... }
قلتي : " أحبك " . من بعييد و ...... / ضعت ! شوفي عاد , لو من قريب ؟؟ ماتغيب أحلام ( قلبي ) في وجودك لك - أسلِّم نفسي - أربطني بـ قيودك ...... جابك الله مدري لي جابك : نصيب : المُهم أسمع " أحبك " . , من لسانك . . . غير [ صح الله لسانك ] هو { مكانك .! ليه يبكي ؟؟ إن مشيتي من مكانك ؟! إحتملت . . . وقلت / ما أسمَع : قلتي من ثاني , " أحبك ..!" رحت ساعتها من الدنيـ يـ يـ يـا إلى ......... ساحل عيونك . و ما رجعت ! ( الوطن ) , حضنك , وأنا من غير أحضانك – غريب يعني من صجِّك ؟ ......... سكوت ..! ما أبي أكثر ألجِّك , قولي بسمعها : " أحبك " وبعدَهَا يمكن ... أموت . قلتي : ساهي قلتي : لاهي وآنا ساكت ..! عاجز / أستوعب كلامك وماهو ( تقليل إحترامك ) ! بس - عيونك من عيونك - [ ما قدر أي شي ياخذني مِنْهَا ] ^ الملاهي , رمش عينك والطفل .. كان ^ إنتباهي ! ايه داخل في عيونك : ما طلعت : الله لا يبعدني عَنْهَا . . . جاع شوقي , لكن بشوفك , شبعت ! منجرح صبعي وإذا " ودِّك " يطيب ؟؟ بطلبك بس شي واحد ما ( طمعت ) قولي : " أحبك " . بصوت عـاااااالي ما سمعت ..! يتبع ... |
رد: أحــمــد الـــصـانــــع .... }
http://el9ane3.jeeran.com/photos/1260445_l.jpg : http://www.shathaaya.com/vb/images/smilies/i.gif http://el9ane3.jeeran.com/photos/1260465_l.jpg : إللي علَّمني " الوقوف " أشوى ما و..صـا/حبي _______ و إنت واقف ليه تَحْبي ؟ آخر دروبك : رجوله ! كنت ساكت . . . لين جرحي من إيدينك . . . صـاح/بيّ _______ و الله مو لايق عليك , تلبس ثياب الـ [ رجوله ] بسألك .. قبل النهايه يا مُمثِّل ( صاحبي ) _______ إللي مثلك كيف يخدع ؟؟ والأوادم يخـ - رجوله !! : http://www.shathaaya.com/vb/images/smilies/i.gif http://el9ane3.jeeran.com/photos/1260532_l.jpg : من إيديها هي تصب : الشاي .. ليّ ______ قلت , صبِّي من حنانك [ بستكانه ] في لقاها ؟ كنِّي " أملك " كل شي .... . ______ في خطاويها مشت لي / بسْ تكانه ! جيت أودِّعها وهي نادت علي : ______ قبل لا أنسى يا غالي ( بستكْ آنه ) ؟! : http://www.shathaaya.com/vb/images/smilies/i.gif http://el9ane3.jeeran.com/photos/1266928_l.jpg : يا ضمى " غيري " أشوفك / إنتـــ ! مائي . .............. و إللي ودَّه ( ياخذك ) ؟ ياكل هوى يا وطن . . . أعلنت حبي , و إنتمـائي .............. و دنيتي : تفداك : يا - كل الـ هوى .... ! : http://www.shathaaya.com/vb/images/smilies/i.gif http://el9ane3.jeeran.com/photos/1271253_l.jpg : - كتابي .... غيرها محدٍ ( قرا / به ) ............... .. مريض إن جيتَها ؟ ألقى , " الدوا " : هي تسولف لي عن [ جروح الـ قرابه ] ............... .. ! سواهي تحتَها . . . تلقى . . . الدواهي ! : http://www.shathaaya.com/vb/images/smilies/i.gif http://el9ane3.jeeran.com/photos/1276286_l.jpg : لك بقول إللي بقوله .... و أنتـَ حر ! .............. ( ما لفت " غيرك " من الناس / إنتـباهي ) يا [ أحبك موت ] . . . و إلا [ أنتحر ] .............. يعني إفهَم , يا بشر إن إنتـ : بـاااهي !! . : http://www.shathaaya.com/vb/images/smilies/i.gif : إيه – شاعر . تعشق الكلمة : حروفي : و المشاعر ما بكت ! إلا بـ قصيدي , من خلقني الله و أنا .. [ حرّ / و وفيّ ] لو " صبع " إيدي ( غدر ) ؟؟! آآ قصـ إيدي ! : http://www.shathaaya.com/vb/images/smilies/i.gif http://www.shathaaya.com/poem/folders/0022/0-64H.jpg : يا قلبي ........ شفت هـ الدنيا . ترى فيها " حزن " و / أفراح و كل واحد على كيفه ! { يحس } بـ أحزانه و أفراحـه ...... هذا . . إللي ( منصدم قلبه ) وقال بـ حسرته : [ أففــ رااااح . ] و . . . ذاك إللي بعد ( مايروح عنَّه ) يقول : - أففـ راحـه !! - : http://www.shathaaya.com/vb/images/smilies/i.gif http://www.shathaya.com/poem/folders/0022/088-999.jpg : - كيف " أحللها ! " على نفسي و ..... هي : طاهره : و تِحْرَم على ( كل الوجود ) ليتها الدنيا على ماتشتـ/هي . . . من كثر ما تدعي في [ وقت السـ جود ] : http://www.shathaaya.com/vb/images/smilies/i.gif http://www.shathaya.com/go/dir/22/0-97T.jpg : نعم ....... . دوّختني !! , قول : اشبلاهم ؟! : " ترى " الراحه " من الحسَّاد ( راحت ) .... . أبيك , الحين تسكِت - أششـ / بلا : هم ! - أنا من وقت . . . عيني . . . ماستـ[ راحت ] : http://www.shathaya.com/go/dir/22/ent.jpg : في البدايه .. قلتي : والله إنتـ فاارق وللـنهاية " درب موحش " , و إختـصرتي . كان ما دمتي [ حبيبه ] ؟ لا إنتـفارق يعني لو ما صرتي / حُبي ؟ .. إختـ صرتي ! : http://www.shathaaya.com/vb/images/smilies/i.gif http://www.shathaya.com/go/dir/22/aLkLmaT.jpg : أنا للحين أقول إنك " حبيبي " .. وما أقول ( الحق ) ! وكل ما أحبس الضيقة بـ صدري ؟ - أفرج الكلمات . أشوف [ الموت ] وما أقدر بـ هاللحظة أقول : إلحق أنا وقلبي وأحاسيسي . . . عشانك . . . عشنا والكـلـ / مات : http://www.shathaaya.com/vb/images/smilies/i.gif يتبع ... |
رد: أحــمــد الـــصـانــــع .... }
مذكراتي ، صارت بـ داخل الدرْج من بعد موتي [ علّموا الناس عَنْهَا ] ما أبي أطوّلها عليكم بـ { هالهَرْج } فـ أجسادنا الأرواح ، محدٍ ضمَنْهَا لي مُهرةٍ .. أمسِك رسنها بلا سِرْج تبكي علي - لا من : ترجّلْت مِنْهَا قولوا لها : إنْ طق في عينَهَا - عِرْج كثر البُكى ما يردّني ، ولا " حِزِنْهَا " ! : : مُنذ بدء الخليقه : به ذكور وإناث ، ــــــــ طيّبه لـ كل طيّب و الخبيثه لـ خبيث أقتنص لي قصيدة ، وأستمد الدماث ــــــــ ومو حرام أقتبسها فكرتي من : حديث ، الحرام : إني أقدر وأنكب المستغاث ــــــــ وآكل أموال قاصر و أدري إنّه وريث صاحبي ، صعب تجني شي ، وقت الحراث ــــــــ يحصد الشر - قلبٍ يزرع الخير حيث : للغدر والمصالح تلقى ناسٍ لهاث ! ــــــــ ومو غريبه تلاقي لك : غثيثه و غثيث !! هذي الدنيا بيتك همّتك بـ الأثاث ــــــــ أوّل الغيث قطره - تبدي وتصير ، [ غيث ] مَرّك الغيم لكن مَر ، دون إكتراث ! ــــــــ وإنت صحراك جردا بـ المطر : تستغيث ! أدري الهَم في قلبك ودنياك عاث ــــــــ غلطتك .. . كنت تِجْمَع في حياتك رثيث ما أبي تطيح لما تنصدم بـ الرثاث ــــــــ للـ عُلى و المعالي ، خل سيرك : حثيث صاحبي في حياتك إبتعد عن ثلاث : ــــــــ [ الغدر ] و [ الغرور ] وفزعتك للـ [ .... ] : نقط بــ أتركها للتأويل ، و كل واحد و .. [ تربيته ] ! يتبع ...... |
رد: أحــمــد الـــصـانــــع .... }
يا [ زمان الحب ] وينك ؟ رحت عني .. ليه تاخذ ؟! ليه أعز الناس مني !؟ يا زماني , ما طلبتك غير : قربه آنا مو ناقص عشان تزيد حزني . يا زماني ليه ؟؟ وشـ معنى حبيبي !! قلت للـ فرحة عن القلبين / غيبي من خذيته صار متعلق " نصيبي " وجيت عند – الموت .. بس الله رحمني .. اللي فيني صار هذا ! ... مو حرام ؟ عيشتي صارت ظلامٍ في ظلام صرت أعبِّر عن جروحي في ( كلام ) وقمت أحس إنَّ { الحزن } شخصٍ عشقني !. مو كفايه ........!؟ جرح غيرك , مو كفايه ؟ كل ما أبدي " بداياتي " : نهايه . يا زمن مره أبي توقف معايه ! راااح صوتي . . . وصرت . . . [ ما أقدَر أغني ] : يتبع ... |
رد: أحــمــد الـــصـانــــع .... }
.,. تواعدنا .,. وقبلي جيت للـ موعد , وأنا واصل و من ( اللهفه ) أحس لـ شوفة عيونك أنا / أدمنت وصلت وقلت : شخبارك ؟ و بيني و بينك .....|...... الفاصل . وشفت ’ الغيره ’ من لحظة لقانـا في عيون البنت !! أسولف لك عليك .. وإنت " ما تدري " , عن الحاصل على بالك أبي غيرك ..!؟ و أنا والله – بغيتك إنت . يزل القلب . . . ومن ربكة شعوري ! . . . قلت : نتواصل ؟ وصحَّتني : أخاف إنِّك تحبني ؟؟ وقلت : أحبك .. [ كنت ! ] ***** يا اللي تقولون لي ( الغاليه صاحت ) , إخذوا لها / القلب / منّي . . . و إخذوا إيديني قالت , خَذَت عـ الفراق , وقالت { إرتاحت } من صدمتي قلت يعني : ما تحبيني ! ..... وصّيتها ...... لا تروح و كيفها [ راحت ] ! و " الله معاها " إذا ودْهَا تخليني . قولوا لها : من عيون القلب ما طاحت مهما تسوي – ( كبيره ) دايم بـ عيني ***** لكم أعذب تحيّه .. للأمانه الموضوع منقول .. . |
رد: أحــمــد الـــصـانــــع .... }
عدي القراقره ’’ كل الشكر لمرورك الطيب لك عبق الجوري ’, |
| الساعة الآن 20:05. |
Powered by vBulletin® Copyright ©2000 - 2025, Jelsoft Enterprises Ltd. , Designed & TranZ By
Almuhajir
new notificatio by 9adq_ala7sas
Developed By Marco Mamdouh
جميع الحقوق محفوظة لشبكة و منتديات صدى الحجاج